17 мая 2022 года ў рамках Майскіх Віткаўскіх чытанняў у дзіцячым аддзеле Слуцкай раённай цэнтральнай бібліятэкі адбылося цікавае знаёмства з цудоўнай пісьменніцай, журналістам, літаратураведам, спецыяльным карэспандэнтам Першага нацыянальнага канала Беларускага радыё, лаўрэатам прэміі часопіса «Вясёлка» — Маргарытай Пятроўнай Прохар.

На гэтай сустрэчы адбылася прэзентацыя кнігі Маргарыты Прохар «Камп’ютарныя коткі». Маленькіх чытачоў вельмі зацікавілі гэтыя казкі. Бо коцікі ў сеціве – гэта вельмі незвычайна і цікава.

Юныя госці з задавальненнем пазнаёміліся з аўтарам кнігі і з яе творчасцю, актыўна прымалі ўдзел у размове з пісьменніцай, задавалі шмат пытанняў, з захапленнем расказвалі пра сваіх хатніх коцікаў, пра іх звычкі і любімыя справы.

Работнікі дзіцячага аддзела падрыхтавалі прыемны падарунак – ролік да кнігі пісьменніцы. Усе жадаючыя атрымалі аўтограф аўтара з найлепшымі пажаданнямі і зрабілі фотаздымкі на памяць.