20 мая 2022 года ў дзіцячым аддзеле Слуцкай раённай цэнтральнай бібліятэкі ў рамках XV Майскіх Віткаўскіх чытанняў прайшоў літаратурны квэст “Вясёлка німбам яркім ззяе!” з удзелам беларускага пісьменніка, лаўрэата Дзяржаўнай прэміі Беларусь, лаўрэата прэміі часопіса “Вясёлка” імя Васіля Віткі Уладзіміра Ліпскага.

Рубрыка “Урокі “Вясёлкі” сустрэла гасцей матэматычнымі заданнямі. Дзеці знайшлі ключ на адной з паліц выставы “Ганаровая стужка “Вясёлкі”.

Рубрыка “Крышку пра кніжку” вітала ўдзельнікаў звесткамі пра новыя творы вядомых беларускіх пісьменнікаў, якія дапамагаюць вывучаць свой край, родную мову, гістарычную і духоўную спадчыну. Юныя случчане знайшлі ключ у кнізе Уладзіміра Ліпскага “Мая Беларусь”.

Рубрыка “Хвілінкі-весялінкі” прапанавала дзецям загадкі, задачкі, скорагаворкі. Дзеці адказалі на пытанне, знайшлі дыск з казкай В. Віткі “Вавёрчына гора” і здабылі ключ.

У рубрыцы “Дзіцячая творчасць” госці пазнаёміліся з выставай работ, якімі падзяліліся нашы маленькія чытачы. Дзеці ўспомнілі творы знакамітых беларускіх пісьменнікаў, нагадалі іх аўтараў. У часопісах і сярод малюнкаў адшукалі наступны ключ.

У рубрыцы “Тэатр Васі Вясёлкіна” лялечны тэатр “Батлейка” Замосцкай сярэдняй школы паказаў спектакль “Вожык і заяц”, які з задавальненнем паглядзелі госці. Дзеці адказалі на апошняе пытанне квэста і, атрымаўшы ключ, склалі выказванне.

Навучэнцы ДУА “Сярэдняя школа № 12 г. Слуцка” і ДУА “Сярэднняя школа №13 г. Слуцка” ў чытальнай зале сустрэліся з супрацоўнікам часопіса “Вясёлка” Ірынай Ходзінай, якая прапанавала ім займальную літаратурную праграму.

Сюрпрызам для ўсіх стала шчырая размова з любімым пісьменнікам Уладзімірам Ліпскім, для якогога дзеці падрыхтавалі вершы.

Навучэнцы ДУА “Гімназія № 1 г. Слуцка”, ДУА «Сярэдняя школа №13 г. Слуцка» запісалі відэаролік, у якім павіншавалі любімы часопіс з юбілеем.