17 мая 2022 года ў рамках XV Майскіх Віткаўскіх чытанняў дзіцячы аддзел Слуцкай раённай цэнтральнай бібліятэкі для навучэнцаў школ горада арганізаваў літаратурны бульвар “Зязяюля слуцкая яму бяссмерце накувала”.

Інтэрактыўная гульня-падарожжа “З Вавёркай гутарыць у гаі” прапанавала юным случчанам праверыць сваю кемлівась: адгадаць загадкі, рашыць задачкі, якія напісаў для дзяцей Васіль Вітка. Хлопчыкі і дзяўчынкі на хуткасць прачыталі віткаўскія скорагаворкі. Маляванка “Вавёрчына гора” пазнаёміла з падзеямі і галоўнымі героямі аднайменнай казкі.

Адгадаўшы загадкі, разгадаўшы рэбусы пра беларускіх птушак у займальнай галаваломцы “Птушыная школа Васіля Віткі”, дзяцей чакаў сюрпрыз —  птушка салавей, якая лічыцца сімвалам нашага горада. Яны даведаліся пра цікавыя факты з жыцця салаўя. Жадаючыя мелі магчымасць размаляваць птушак, якія сустракаюцца ў творах В. Віткі.

Літаратурны ракурс “Роднай мовы пясняр” запрасіў усіх прысутных выразна прачытаць вершы нашага знакамітага земляка каля бібліявокан і пазнаёміцца з кніжнай выставай “Жыў на свеце дзед Васіль”.